Жаңа Барыс жылының басы маңғыстаулықтар үшін жақсы істермен, жарқын жаңалықтармен басталды. Маңғыстау аудандық мәслихатының кеңейтілген сессиясына қатысу үшін арнайы ат басын бұрып келген облыс әкімі Қырымбек Көшербаев ең алдымен «Нұр Отан» ХДП аудандық филиалының жаңа ғимараты ашылу салтанатында сөз сөйледі. -Құрметті маңғыстаулықтар, -деді облыс әкімі, - өздеріңіз жақсы білесіздер, қазір тәуелсіз елдің негізін қалап жатырмыз. Ол бақтың басымызға бұйырғанына келесі жылы жиырма жыл толғалы тұр, еркіндігіміздің ерекше тойы болғалы тұр.

Ана мен бала жылы аясында ашылған Ақтау қалалық перзентханасы 1-шағын аудандағы медициналық қалашықта орналасқан. Бұрынғы ғимаратты перзентханаға ыңғайлап, күрделі жөндеуден өткізу үшін жергілікті бюджеттен 67 миллион теңге бөлінген болатын. Ал оны қажетті құралдармен жабдықтауды «Н оперейтинг компани» ЖШС мойнына алған-ды. Кәсіпорынның осы мақсатқа бөлген 90 миллион теңге қаржысына перзентханаға бастапқы кезеңде аса маңызды болатын заманауи аспаптар сатып алынды. Бұлар-өмірлік маңызды функцияларды қадағалауға мүмкіндік беретін мониторлар, ИВЛ аппаратуралары, шала туылған шараналарға арналған кувездер, УДЗ аппараты, кардиотомограф, фетальді мониторлар, ересектерге және жаңа туылған нәрестелерге арналған мониторлар, оталау үстелі, оталау шамы, көп функциялы босандыратын кереуеттер (трансформерлер), ересектер мен нәрестелер кереуеттері, әйелдің толғағын жеңілдетуге септігі тиетін жабдықтар және басқалар.

Елбасы Нұрсұлтан Әбішұлы Назарбаевтың биылғы Қазақстан халқына Жолдауының «Жаңа онжылдық – жаңа экономикалық өрлеу – Қазақстанның жаңа мүмкіндіктері» деп аталуының өзі көзі қарақты адамға болашаққа деген нық сенім мен үлкен үміт ұялатады. Көріп  отырғанымыздай , біз Қазақстан Республикасы экономикасының аса қиын кезеңі – 1997 жылы қабылданған «Қазақстан - 2030» стратегиялық бағдарламасының бірінші даму онжылдығын қорытындылап, екінші онжылдығына аяқ бастық және Елбасы алдағы міндеттерімізді айқындап, еліміздің жаңа экономикалық өрлеу бағдарламасын алға тартып отыр. Енді өзім 30 жылдан бері үздіксіз еңбек етіп келе жатырған агроөнеркәсіп кешенінің дамуына тоқталатын болсам, жалпы мен Елбасының өткен жылғы Жолдауында да, биылғы Жолдауында да, «Нұр Отан» ХДП-ның кезектен тыс ΧІІ съезінде де агроөнеркәсіп кешенін дамытуға баса назар аударуы қуантады.